Veit du - for ca. 500 millionar år sidan krasjlanda ein meteoritt på Ritland! Krateret er ca. 2,7 km i tverrsnitt, men det er delvis skjult.
Turen startar frå parkeringa på Kleivaland i Vormedalen. Løypa følger for det meste traktorveg frå parkeringa, i lett terreng og på godt underlag.
Når du kjem til gapahuken har du utsikt ut over krateret. Her finn du også rikeleg med informasjon om krateret. I enden av krateret vil du sjå ein 400 meter høg skrent, denne skrenten er restar av sjøleire som fylte krateret etter danninga. Dette er einaste staden i Rogaland der du kan finna fosil i fjellet.
På returen kan du følge same veg tilbake, eller velje ein lengre tur og ta Stavanger Turistforening si merka løype til mellom anna Melands Grønahei.
Turen til frå Kleivaland til Ritlandskrateret tek ca. 1 time og er eit flott turmål heile året.
Foto: Pål Christensen, Stavanger Aftenblad.
Finn fram
Frå Hjelmeland følgjer du skilting inn mot Vormedalen. Her finn du skilt vidare til parkering for turen til Ritlandskrateret/Kleivaland.
Foto: Pål Christensen, Stavanger Aftenblad.